Texnologiyanın sərtliyinin yaradıcılığın zərifliyi ilə qovuşduğu yerdə “Baku Steel Art” Beynəlxalq Metal Simpoziumu doğulur. “Baku Steel Company” QSC tərəfindən artıq ikinci dəfə keçirilən bu tədbir, “Bakıya Uçuş. Gələcəyi İNDİ duy” beynəlxalq incəsənət festivalının ayrılmaz hissəsi kimi sənaye ilə sənəti eyni səhnədə bir araya gətirir. Burada sənətkarlar polada yeni nəfəs verərək, onu orijinal və unikal sənət əsərlərinə çevirirlər. Müxtəlif bədii yanaşmalarla yaradılan heykəltəraşlıq nümunələri BSC-nin istehsal etdiyi poladla sənətin estetik dəyərlərini birləşdirir və müasir incəsənətin yeni ifadə formalarını ortaya qoyur. Simpozium təkcə texnologiya və sənət arasında dialoqu gücləndirmir, həm də ekoloji mesajı ilə diqqət çəkir: heykəltəraşların yaratdığı kompozisiyalar təbiəti qorumağın, tullantılara yeni həyat verməyin və incəsənətlə harmoniyada yaşamağın vacibliyini vurğulayır. Layihə tamamlandıqdan sonra bu möhtəşəm əsərlər Bakı Bulvarında açıq səma altında sərgilənəcək. Burada ziyarətçilər sənayenin bədii potensialını hiss edəcək, texnologiyanın sərtliyinin sənətin poetik dili ilə necə harmoniya yaratdığını öz gözləri ilə görəcəklər. “Baku Steel Art 2025” – bu sadəcə sərgi deyil, poladla sənətin görüş nöqtəsi, gələcək nəsillərə ilham verəcək bir yaradıcılıq körpüsüdür.