“SƏRHƏDSİZ UÇUŞ” DANCEABILITY AZERBAIJAN İNKLÜZİV MULTİDİSSİPLİNAR SƏRGİNİ TƏQDİM EDİR 30 oktyabr – 1 noyabr 2026 15 Qüllə küçəsi, İçərişəhər, Bakı “Sərhədsiz Uçuş” məlumatlılığın artırılması, iştirak və birgə fəaliyyət üçün şərait yaradır. Sərgi imperator qartalına, digər yırtıcı quşlara və Azərbaycanın “Qırmızı Kitab”ına daxil edilmiş quş növlərinə diqqət çəkərək, quşlara və paylaşdığımız ekosistemlərə daha böyük qayğı ilə yanaşmağa təşviq edir. Fly to Baku Art Weekend çərçivəsində hazırlanan sərgi insan fəaliyyəti və infrastrukturun quşlara, onların yaşayış mühitinə və sağ qalmasına necə təsir etdiyini araşdırır. Elektrik xətləri və dirəkləri, külək turbinləri, bina və şüşə səthlərlə toqquşmalar, eləcə də yırtıcı quşların qanunsuz ovlanması, tutulması və ticarəti sərgidə diqqət çəkilən əsas təhlükələr sırasındadır. İnklüziv rəqəmsal rəqs performansı, mətn və illüstrasiyalar vasitəsilə hekayənin təqdimatı, interaktiv detektiv oyunları, panel müzakirələri və digər iştirakçılı formatlar vasitəsilə ziyarətçilər yalnız məlumat əldə etməyə deyil, həm də təbiətlə münasibətləri və onun qorunmasında öz rolları haqqında düşünməyə dəvət olunurlar. Sərgi əlilliyi olan insanların birbaşa iştirakı ilə, müxtəlif ziyarətçilərin ehtiyacları nəzərə alınaraq işarət dili tərcüməsi, audiotəsvir və sensor vasitələri kimi universal dizayn prinsipləri əsasında hazırlanıb.