Müasir İncəsənət Muzeyində rəssam Anar Hüseynzadənin “O” adlı fərdi sərgisi keçiriləcək. Sərgi insanın varlıq, həqiqət və mənəvi axtarışını fiqurativ rəngkarlıq və portretlər vasitəsilə araşdırır. 

Sərginin əsasını təşkil edən “O” anlayışı konkret bir ad və ya obrazla məhdudlaşmayan, görünən və görünməyən aləmlər arasındakı sərhəddə dayanan bir varlığı ifadə edir. “O” başlanğıc və son, mövcudluq və yoxluq, insan və onun axtardığı həqiqət arasında qurulan əlaqənin simvoluna çevrilir. 

Anar Hüseynzadənin təqdim etdiyi əsərlərdə insan obrazı xüsusi yer tutur. Rəssam insanı yalnız xarici görünüşü ilə deyil, onun daxili dünyası, yaşadığı təcrübələr, qarşılaşdığı insanlar və mənəvi axtarışları ilə birlikdə nəzərdən keçirir. Sərginin adı olan “O” eyni zamanda bu axtarışın açıq sonluğunu ifadə edir: “O” kimdir? 

Anar Hüseynzadənin yaradıcılığında ədəbiyyat, tarix, əfsanələr, dini-fəlsəfi düşüncə və şəxsi yuxular mühüm ilham mənbələridir. İslam, xristianlıq və buddizm kimi müxtəlif mənəvi ənənələrdən gələn motivlər rəssamın əsərlərində konkret dini təsvirlərdən daha çox insanın daxili yolunu və mənəvi axtarışını ifadə edən simvolik elementlər kimi çıxış edir. 

“O” sərgisi insanın həyat boyu davam edən axtarışına diqqət yönəldir. İnsan doğulur, axtarır, sevir, itirir və yenidən axtarır. Bu prosesin sonunda isə cavabdan çox yeni bir sual meydana çıxır: insan əslində nəyi axtarır?